遠聲試閘花絮 10/2/2009

鋒火台上見友誼，劉志森與賀蘭杜夫便是好例子，經常坐在一起觀操，以英語交談，同聲同氣，梗係「分過打崩」，陣上會否你死我活，大家不妨細心觀察。大地回春下，馬會於周末情人節安排了春季錦標，真係應晒景，唔知屆時會唔會有朱古力派，大家甜蜜蜜。

三組試閘靚馬多，第一組錢健明開小差，好兄弟林凱代勞，策騎「偉寶之星」，座騎有些懶性，未見省鏡。「醒目開心」冼文諾操刀，走來步伐開揚，佳態洋溢，周末錦標賽可以睇好了，下一個超級任務是三月一日港澳盃，且看能否取得額外獎金。

能媲美馬王者，非譚文就「英勇名駒」莫屬，出閘反應快，旋即放頭自領，率先衝過終點，狀態大勇，值五粒星。 此組有「鬥志雄」退出，原定配謝偉豪者，緣慳一面。

第二組「宮殿福將」亦有報名春季錦標，受「醒目開心」相讓十一磅，未知鹿死誰手，邵偉華試來亦見狀態對辦，一對聯袂回來串成連贏機會亦高。「澳洲情懷」試閘常客，唔試唔舒服，今次唔用十磅仔用林凱，馬匹速度保持。冼文諾肯騎「歐洲快駒」，不會無的放矢，李家輝全朝亦獨出此駒，值得留意。

拉士一組六駒列陣，杜西奧捲土重來，策騎「金鑛」風采依然，座騎越跑越後，仍待琢磨。「新人王」用冼文諾，出閘後由頭帶到尾，形格及質素俱不俗之馬。「常歡笑」用施其安，一路吊住前駒來跑，亦見佳態，馬房兵源不多，可用即用了。